Hér eru birtar tillögur eða drög að breytingartillögum gerðum í kjölfar samræðu á vinnufundum Neista 12. og 19. október og í áframahaldandi samræðu þátttakenda á menntaborði vinnufundanna, sjá þátttakendur hér neðar í færslu. Umsjón með útgangspunktum hafði Páll Ásgeir Davíðsson, forstöðumaður Eþikos-Miðstöðvar Íslands um samfélagsábyrgð fyrirtækja og Viðar Hreinsson framkvæmdastjóri ReykjavíkurAkademíunnar.

(mynd af snæuglu fengin á Vísindavef Háskóla Íslands)

Mikilvæg verkefni og markmið í menntamálum á háskólastigi á Íslandi

Í hnotskurn: Virkja þarf á markvissari hátt þá krafta og þekkingu sem íslenskar menntastofnanir búa yfir. Huga þarf að grunninnviðum menntastofnana með því að efla alþjóðlegar rannsóknir og endurskoða núverandi mats- og styrkjakerfi. Auka þarf samstarf á milli menntastofnana landsins og skapa fjölbreyttari vettvanga til rannsókna og náms fyrir innlenda sem erlenda aðila. Tryggja þarf sjálfstæði íslenskra menntastofnana gagnvart ráðandi markaðsöflum og hlúa að víðtækum tengslum þeirra við atvinnulíf og samfélagslega uppbyggingu.  Lagt er til að stofnuð verði stafræn gagnasöfn á sviði hugvísinda-, félagsvísinda- raunvísinda- og umhverfisrannsókna. (more…)

Hér eru drög að tillögum um breytingar í málefnum hönnunar á Íslandi, unnar á vinnfundum Neista 12. og 19. október.

(myndin er af stólum Sveins Kjarvals)

Mikilvæg tækifæri og markmið í hönnun á Íslandi

Í hnotskurn: Íslensk hönnun býr yfir skapandi afli sem getur styrkt íslenskt samfélag og stuðlað að fjölbreyttu atvinnulífi. Öll nýsköpunarverkefni þarfnast hugvits og þekkingar hönnuða. Mikilvægt er að hönnuðir komi fljótt að verkefnum hvort sem það er hjá fyrirtækjum, hinu opinbera eða á öðrum vettvangi. Ríkjandi tilhneiging hefur verið að fá hönnuði of seint inn í ferli í stað þess að virkja reynslu þeirra á frumstigum þróunar vöru og verkefna. Þegar eru í gangi mörg áhugaverð verkefni, þar sem hönnuðir vinna að verkefnum sem tengjast íslenskri arfleið eins og söfnum, landbúnaðar- og matarmenningu, ferðaþjónustu og iðnframleiðslu. Mikilvægt er að styðja vel við þessi verkefni og leiða saman hönnuði, fjárfesta, viðskipta- og markaðsaðila til að skapa ný og margbreytileg tækifæri á Íslandi. (more…)

Hér eru drög að tillögum til endurbóta á landslagi líftækni á Íslandi, en drögin voru unnin á vinnufundum Neista og í áframhaldandi samræðu.

Umsjón með samræðu og vinnslu útgangspunkta hafði Dr. Karl Ægir Karlsson, Lektor í tækni- og verkfræðideild H.R. sjá http://www.karlsstofa.is/?page_id=5

Mikilvæg verkefni og markmið í líftækniþróun á Íslandi

Í hnotskurn: Tryggja þarf fjárhagslegt, þekkingarlegt og reglugerðarlegt umhverfi líftæknifyrirtækja með stöðugum gjaldmiðli, styrkum innnlendum háskóladeildum og straumlínulaga regluverki. Endurskoða þarf kerfi skattaívilnunar og styrkjaveitinga og auðvelda aðgengi erlendra sérfræðinga til landsins. Beina þarf orkufyrirtækjum að sprotafyrirtækjum í líftækni og afnema ívilnanir fyrir þátttöku í orkufrekri stóriðju.
(more…)

Frá Vísi.is

Björk Guðmundsdóttir tónlistarmaður afhenti Geir H. Haarde forsætisráðherra pakka í Stjórnarráðinu í gær með tillögum sem nýta má sprota- og þróunarfyrirtækjum til framdráttar. Með henni voru Svafa Grönfeldt, rektor Háskólans í Reykjavík og Oddný Eir Ævarsdóttir, ritstjóri náttúra.info.
„Þetta eru tillögur eða útgangspunktar um það sem fara má betur í reglugerðum og sjóðum til að greiða frekar götu nýsköpunar á Íslandi,“ segir Björk. „Þetta er skemmtilegt, það veitir ekkert af góðum hugmyndum núna,“ sagði Geir þegar hann hafði opnað pakkann og ekki kárnaði gamanið hjá fyrrverandi fjármálaráðherranum þegar Björk bætti því við að mikið af því sem verið væri að mæla með í þessum tillögum þyrfti ekki að kosta eyri. „Eitt af því sem mælt er með að gert verði er að ryðja úr vegi hindrunum og uppfæra regluverkið svolítið,“ segir Björk.
Tillögurnar eru afrakstur verkefnisins Neista sem Háskólinn í Reykjavík, Björk, Náttúra.info og Klak hafa unnið að. Svafa benti Geir á að pakkinn væri lítill en í upphafi hefðu fyrirtækin Össur og Marel verið hugmyndir sem hefðu getað rúmast í slíkum pakka.(jse).

http://www.visir.is/article/20081113/FRETTIR01/311448375

Fréttablaðið birtir Neista af neista á næstu dögum; útgangspunkta frá vinnufundum Neista, og samhliða birtast skýrslurnar á Nattura.info, auk frekari upplýsinga. Þetta eru útgangspunktar, drög að tillögum að breytingum kerfinu, svo að nýsköpun og sjálfbær þróun geti frekast orðið á Íslandi. Fyrstu drög varða hátæknina:

Mikilvæg verkefni og markmið í hátækniþróun á Íslandi
Í hnotskurn: Skapa þarf aðlaðandi alþjóðlegt starfsumhverfi, bæði lagalegt og samfélagslegt; Leggja áherslu á tengsl starfsumhverfis, menntunar og rannsókna; Styðja vel við allt ferli nýsköpunar til að stuðla að ríkulegri uppskeru. Markmiðum þessum verður aðeins náð með góðri samvinnu við stjórnvöld og því mikilvægt að þau séu vel upplýst um tækifæri hátæknisviðsins, sem ávalt horfir til framtíðar.

(more…)

Björk Guðmundsdóttir afhenti Geir H. Haarde, forsætisráðherra, lítinn gullpakka, með slaufu í fánalitunum, í gær 12. nóvember, 2008. Svafa Grönfelt, rektor Háskólans í Reykjavík, og ritstjóri Nattura.info, Oddný Eir, fylgdu Björku í Stjórnarráðið þar sem afhendingin á litla pakkanum fór fram. Í pakkanum voru drög að skýrslu um breytingartillögur um hvernig bæta megi jarðveg sprotafyrirtækja, nýsköpunarrannsókna og fjölbreyttrar og sjálfbærrar atvinnuuppbyggingar á Íslandi. Þetta eru útgangspunktar fyrir frekari rannsókn á möguleikum og hindrunum sprotavaxtar og sjálfbærrar þróunar á Íslandi í átta málaflokkum. Meðfylgjandi var bréf til Ríkisstjórnar Íslands:

“Rannsóknar- og undirbúningsvinnan heldur áfram, í óbilandi trú á möguleikum Íslandsbyggðar, með þolinmæði og þrautseigju. Stefnumótunar- og uppbyggingarstarf á erfiðum tímum verður ekki unnið eingöngu af stjórnmálamönnum heldur í virkum tengslum við staðbundið reynsluafl og faglega þekkingu hvaðanæva úr samfélaginu. Breytingar á afstöðu og reglugerðarkerfum krefst síðan gríðarlegrar eftirfylgni inn í komandi tíma.” (more…)

Heitar laugar

Um vef nattura.info má segja, vegna fjölda fyrirspurna, að hann er vísir að sprotasafni og safni af upplýsingum um rannsóknir og framsækið starf á sviði nýsköpunar og sjálfbærni. Eftir fremsta megni verður sprotasafnið kynnt sem víðast og framgangsaðilum vísað á það. Hins vegar er Nattura.info hvorki fjárfestingar-, þróunar-, kynningar- né söluaðili.

Nattura.info berast margar góðar hugmyndir um sprotahugmyndir og fyrirtæki, um þekkingar- og tengslanet. Það er aldeilis gleðilegt að uppgötva hvað er margt búið að gera gott á Íslandi á undanförnum árum. En líka sorglegt til þess að vita hversu erfiður framgangur frumkvöðla hefur verið. Þó eru nokkur dæmi um að framgangan hafi tekist og það vel. Og þau dæmi gætu orðið mörg, ef við hlúum vel að hugmyndum, að jarðvegi og öðrum vaxtarskilyrðum.

Nattura.info er tilraun til að hlúa að þessum vaxtarskilyrðum, með því að beina athyglinni að þeim og hvetja til samræðu um þau. Vefnum er að verða leiðarvísir að upplýsingum um sprotafyrirtæki, nýsköpunartilraunir og rannsóknarverkefni, um umhverfismál, heildræna sýn og sjálfbæra þróun; um skapandi atvinnu-uppbygingu, um nýsköpunar- og þekkingarstofnanir, framgangs- og fjárfestingarstofnanir. Vefnum er að verða kortlagning á því landslagi sem nú þegar er í heimi náttúruverndar og nýsköpunar. En líka korlagning á því landslagi sem verður. (more…)